|
|
 |
retrat
de comun > Les cöres
y scores dl comun |
|
|
| |
| Les cöres y scores dl comun |
| |
 Denant
che San Ciascian (1537 m) gniss colonisè por tres,
gnô chësc raiun adorè sciöche munt di
armënc y â porchël inom Armentarola. Deache
la dlijia ê gnüda consacrada al sant Ciascian, à
le paîsc ciafè chësc inom. Dl 1296
vëgnel nominè por la prüma ota inoms de lüc
da San Ciascian, insciö ince por La Ila y Badia. Cina al
1449 ê les funziuns dl bato y dla supultüra ma a
La Pli de Mareo, dlijia uma dla valada. Na capela a San
Ciascian êl gnü benedi dl 1541, mo n prou â
le paisc pormò ciafé incër le 1760. La dlijia
da segn é gnüda fata sö dl 1782, le gran altè
é abelì da n cuader che mostra la martorjada de
San Ciascian y depënt él gnü dal artist Carlo
Henrici de Schlesien. A San Ciascian él na scolina y
la scora elementara. Implö él te chësc paisc
na ciasa de cultura. |
| |
| La fraziun da La Ila é inanter
chëra de Badia y de San Ciascian. Le paisc vedl ê
fat sö incër la dlijia; incö é la gran
pert dles ciases jö sön le stradun. Dl 1516 êl
gnü benedì la prüma picera dlijia "ad
stellam" in onur de Santa Maria; da chësc él
nasciü l' inom todësch "Stern" por La Ila.
Dl 1584 insö messâ le curat de Badia dì ot
otes al ann mëssa a La Ila y plö tert ince plö
gonot. Dl 1805 êl gnü fat sö la calonia da La
Ila por tó sö n curat. Sides dal 1888 che dal 1952
é la dlijia gnüda ingrandida. Les pitüres é
dl artist Jan Mati Pescoler (1875-1951) da Grones/Badia. La
Ila à na scolina, na scora elementara y mesana y döes
scores altes. |
| |
 Badia
é na fraziun dl comun dal medemo inom. La cüra é
dedicada ai sanc Iaco y Linert. Dl 1449 à Badia ciafè
n prou che messâ sucudì valgünes otes al ann
La Val, Corvara, La Ila y Armentarola. Dl 1682 ciafâ Badia
n benefize che messâ tignì scora y daidè
fora tles atres cüres. Dal 1891 incà é Badia
ploania y dal 1949 insö é le ploan de Badia ince
degan dl decanat Mareo. Dl 1347 dôl bele ester a Badia
na dlijia che é spo gnüda ingrandida plö otes.
Dal 1776/78 àn fat sö la gran dlijia nöia da
sëgn tl stil Penz sot al maester Franz Singer (+ 1789)
da Götzens. Depënta fora l' à Mathäus
Günther (1705-1788), diretur dla Academia da Augsburg.
Dl 1782 é la dlijia gnüda consacrada dal vësco
da Porsenù Josef von Spaur. La dlijia de Badia é
n iuvel por ci che reverda la costruziun; le pitüres di
ôc mostra la vita di snc Iaco y Linert, i altà
é dedicà ala Macolata, a Sant Antone y a S. Maria
dal Rosare. |
|
|
| |
|
|
| |
|
|
|
