Banca dl tëmp - çi é pa chësc?

La Banca dl tëmp é na assoziaziun non profit che basëia sön l'prinzip dl barat de sorvisc sënza paiamënt de chisc.

Banches dl tëmp esistel oramai sura döt le monn. Inçe te Südtirol esisteres bele te deplü citês. Do le motto: „tëmp é la cossa plü de valüta che na porsona po scinché“ éres gnüdes a s’al dè, tl pröm mâ por la jënt atëmpada, mo spo defata do inçe por düç i atri.

La banca dl tëmp se basëia sön le prinzip dl barat. Chi che é interessà po se scrì ite sciöche mëmber pro la banca dl tëmp y dè dant, çi sort de sorvisc ch’ai oress pité. Al dess ester val’ ch’ai sa da fà bun y ch’ai fej gian. Canche n ater mëmber scrit ite ala banca dl tëmp adora chësc sorvisc, pòl cherdè sö chi che pîta le sorvisc che ti interessëia y chësta porsona po spo tó la dezijiun sce al ó le fà o no. Por vigni sorvisc fat ciafa le mëmber scrit ite punç da podëi baratè ite, canch’al à debojëgn, por ciafè n ater sorvisc da vignun di atri mëmbri scriç ite ala medéma banca. A chësta mainira é la banca dl tëmp n’assoziaziun zënza fins de davagn y se basëia sön le prinzip dl barat de sorvisc zënza paiamënt cun scioldi.

Por ejëmpl: Incö va Maria a cumprè ite por me, indoman vài iö cun Alex dal dotur, Alex jarà porchël a ti sié le prè a Harald, Harald ti cuncia porchël la spina dal’ega a Barbara, che ti arjigna na turta a Maria y .... Acompagné zacai a pé, sön le scagn da rodes o cun l’auto a spazier, te ofizi, a vijites, fà comisciuns, çiarè sura de pici mituns, daidé zacai o ti tignì compagnia, pastelnè, desparè, fà sö lëgna, laurè cun le computer y i.i.

Cun vigni mëmber che vëgn pormez crësc la banca dl tëmp y la paleta di sorvisc devënta plü rica. Inçe por i jogn devënta l’oferta interessanta: an pò por ejëmpl baratè fora n curs de computer cun laûrs da romenè sö l’urt. Te vigni cajo po la paleta mâ gnì plü rica de ofertes interessantes y porchël pòra dessigü avëi n dagnì.

L'adejiun é debann y an ne paia gnanca degüna contribuziun soziala anuala. Impo é i mëmbri assigurá cuntra inzidënç y responsabilité zivila tratan l'eserzize di sorisc.

Inçe chilò da nos vëgnel metü a jì na banca dl tëmp che piará ia dal 01.01.2010. Al po tó pert düç i residënç dl comun da Badia, da Corvara y da La Val. I sorvisc che vëgn pità é da odëi sön la detlarziun de adejiun injuntada dessot.

L'assessuria dl comun da Badia y presidënta dl comité por la banca dl tëmp, Dapoz Edith, é inçe te vigni mumënt a osta desposiziun por informaziuns plö monüdes (tel.: 0471/839714); Injuntà ciafes l'formular de adejiun ala "banca dl tëmp" y l'bonn dl tëmp por sorvisc faç.

Formular de adejiun

 Bonn dl tëmp